La satira del nostro tempo
Trappole elettorali
« Cumpari meu, chi tempi,
’nu veru finimundu
e ’sta barca ’taliana
sta jendu propriu ’n fundu.
I nostri combattenti
p’‘a libertà moriru,
ma poi a comandari
i furbi ’ndi tradiru.
“Votati ora a Repubbrica”
- si dissi - “e no’ lu Re”,
ma chidi chi ’nchianaru
penzaru sulu a sé.
Sinistra, centru o destra
no’ ’ndi cambiaru statu,
lu populu ’mbranatu
da tutti fu fregatu.
Partiru i nostri figghj
comu partiru i patri,
pe’ ’nu pezzu di pani
bussaru sulu a ll’atri.
Ricorda, Gianni, ’u nomi
di chi fu ’ndo Guvernu,
se ’nc’era patri Dante
mandava tutti ’o ’Mpernu ».
« Grazii, cumpari Peppi,
ca ’n guardia mi mentisti,
quand’è l’ura ’i votari
sapimu cu’ su chisti.
Me’ patri cu’ lavuru
’nda terra si ’njmbò,
ma cu’ grandi decoru
’a casa so’ portò.
’A sira o’ focularu
stàvanu sempri uniti,
a’ festa tutti a’ Missa
mugghjeri cu’ mariti.
C’’a scusa ’i pandemia
a nui jntra chiudiru,
’a chiesia e li negozi
a mali po’ finiru.
Cu’ l’arburi tagghjati,
c’’a terra ’bbandunata,
’a spisa chi facimu
è tutta ’mbelenata.
Tivù e mezzi vari
su’ tutti un teatrinu,
lavàggiu ’i ceravedu
di cu’ non l’avi finu.
Votari è ’nu dirittu
a lungu conquistatu,
cacciamu i parassiti
chi ’nd’hannu rovinatu.
’U lupu cambia ’u pilu
ma ’u viziu è sempri quellu:
facimu largu ’e giuvani
chiudimu ’stu bordellu! ».
- Terra gloriosa e bella,
Calabria nostra cara,
i figli tuoi ti cercano
come una perla rara.
Torna nel tuo splendore,
mostra all’umanità
lo spirito che anela
giustizia e verità! -
Domenico
Caruso
https://www.approdonews.it/giornale/trappole-elettorali
